Fatima Algorashi

مدني يا اجمل خبر

حرة كما ينبغي
آمنة كما عهدناها

وفي نهاية 2024
ما توقف تتعلم كل المجالات بتطور بسرعة شديدة خليك مواكب
سنة سعيدة عليكم
وسنة نجاح وانجازات يارب

كل ما تقفل معاي بقول حارجع السودان وازرع في حوش بيتنا جرجير وطماطم

تم تغيير الخطة لبصل 🤣🤣🤣

البراندينج كما يجب أن يكون
دا ودك، عارفين شكله وريحته
اغترب، واتغير شكله🤣

هل منتجك جاهز لأسواق أوسع؟
قادر تحافظ على روحه وتطوره؟
مستعد تبذل الجهد المطلوب؟

2025 عايزين نخلي 2025 سنة المنتجات السودانية بإمتياز 😉

التسويق عبر المؤثرين: الإيجابيات والسلبيات

الإيجابية الأبرز:
سرعة الوصول إلى قاعدة جماهيرية كبيرة في وقت قصير.

السلبيات:
1️⃣ تكاليف مرتفعة:
: التعاون مع مؤثرين مشهورين قد يتطلب ميزانيات ضخمة.

2️⃣ قلة المصداقية أحيانًا: الإفراط في الترويج أو العمل مع عدة علامات تجارية متشابهة قد يضعف ثقة الجمهور بالمؤثر.

3️⃣ نتائج غير مضمونة وغير قابلة للقياس: قد لا تحقق الحملة المبيعات أو النتائج المتوقعة.

4️⃣ اختيار المؤثر غير المناسب: قد يؤدي عدم توافق المؤثر مع هوية العلامة إلى الإضرار بسمعتها.

التسويق عبر المؤثرين ليس دائمًا الخيار الأنسب. لذلك، يجب اختيار المؤثرين بعناية لضمان توافقهم مع قيم العلامة التجارية وتحقيق الأهداف المرجوة.

هل تعرف قيم علامتك التجارية؟

سؤال🧐
اذا كنت صاحب منتج او خدمة بتعلن مع مشاهير؟

واذا مستهلك هل تثق في اعلانات المشاهير؟

كيف عايشين في البلد دي؟؟

اكتر سؤال اتكرر علي في الفترة الاخيرة من السودانين الجو بعد الحر ب

السؤال في الأول بقى لي غريب لكن رجعت بالزاكرة لأول سنة في عمان وكيف كانت صعبة بالنسبة لي . الانتقال لمجتمع جديد بيئة جديدة وشكل حياة وناس مختلفين ماحاجة سهلة خصوصا لو ما طالع بإرادتك .

فيا عزيزي الانسان تعال اوريك كيف تتعايش في عمان
ما تفتش على مجتمعات السودانين وتحصر نفسك معاهم ايوا مجتمعاتنا حلوة ومساندة وساهل بالنسبة لينا نتواصل بس اتعرف على مجتمعات تانية

استمتع بالبلد وتفاصيلها الطبيعية، عمان غنية جدا بالاماكن الطبيعية والسياحية وحاليا الجو اجمل ما يكون الحمدلله فا دي فرصة تتعرفو على البلد

تطوع وشارك في الفعاليات المحلية في كتير من الجمعيات والمؤسسات المجتمعية بتحتاج متطوعين لو مرت عليك فرصة زي دي ما تفوتها حتكسبو منها معارف وخبرات لا تقدر بثمن وبقول الكلام دا من تجربة

اخر حاجة امتن لنعمة الامن والآمان واشكر ربنا عليها ونسأل الله يديمها على عمان 🇴🇲 وعلى كل اوطاننا العربية

كل الناس عارفة انه ممكن تربح من نشر الفيديوهات على السوشيل ميديا، لكن لو الربح جاي من فضح الناس والتعدي على خصوصياتهم، ده ما نجاح. ده خسارة ليك في الدنيا والآخرة.

المخيف إنه بقى في عدد كبير من الصفحات مخصصة لنشر خصوصيات الناس والضحك عليهم. والأسوأ لما تجي تبرر لي نفسك وتقول: هم نشروها بنفسهم! يا أخي، ولا تزر وازرة وزر أخرى، وربنا حيحاسبك على فعلك، وحيحاسبهم على فعلهم.

ماترضى على نفسك تكسب على حساب أذية الآخرين. لو ما عندك محتوى ينفع الناس أو يسعدهم، الأفضل تسكت.

وعزيزي المتابع النصح والتوجيهه في النوعية دي من الفيديوهات ما بفيد بالعكس بساعد في انتشارها اكتر. تجنبو تماما متابعة اي صفحات قايمة على محتوى مسروق وعدم التعليق عليها. خليها تقيف عندك🛑🛑🛑

على طاري فصلة منصات Meta امس
كصاحب مشروع كيف عميلك حيرجع ليك لو فقدت منصاتك؟ او كيف انت حتقدر تتواصل معاهم؟؟

بعد تجربة تهكير مريرة اترعبت بس الحمدلله
طلعت قاطعة عامة 🤣🤣

نواصل في رحلة المنتجات السودانية الى العالمية

1. التسويق الصح:
• لازم نفهم الجمهور المستهدف ونخاطبهم بطريقة مناسبه ليهم.
• نستخدم وسائل التواصل الاجتماعي عشان نعرف العالم بمنتجاتنا. محتاجين نفهم افضل المنصات لكل بلد وجمهور مستهدف ونتابع تحديثات الخوارزميات

2. التغليف الجذاب:
• ما بنقدر ننافس من غير تغليف محترم. لازم نقدم المنتج بطريقة ملفتة، بتجمع بين أصالة السودان والعالمية. خيارات التغليف اصبحت متاحة وباسعار معقولة جدا

3. الجودة:
• لازم نهتم بالجودة قبل أي شي، لأن المنتج الرديء ما بيسوق نفسه، والجودة هي البتخلي الزبون يرجع تاني.

4. تغيير طريقة التفكير:
• نتوقف عن إنتاج حاجات لمجتمعنا بس، ونبدأ ننتج حاجات تناسب العالم كله.
• نخلي عندنا ثقة في منتجاتنا ونقدرها.

السودان غني بموارده وثقافته، لكن النجاح بيحتاج شغل جماعي وتفكير استراتيجي. إحنا بدأنا، لكن نحتاج نسرّع الخطى عشان نواكب العالم.

شنو رأيكم؟ هل شايفين فعلاً المنتجات السودانية ممكن تنافس لو اتقدمت بالطريقة الصحيحة؟

ليه المنتجات السودانية ما مشهورة برة السودان؟

سألتكم عن السبب، وجاتني ردود كتيرة أغلبها بتدور حول مشاكل في التسويق، التغليف، والجودة. وفعلا دي اهم الأسباب، ورغم كل شي، أعتقد إننا بدأنا ندخل السوق العالمي بخطوات صغيرة لكنها ملحوظة.

طيب تعالو نفصل المشاكل دي ونوجد ليها حلول

1. التسويق: أساس النجاح
أغلب المنتجات السودانية ما بتلقى حقها في التسويق. يعني المنتج بيكون ممتاز، لكن ما في طريقة عرض بتوصل المعلومة للجمهور. السودانيين أغلبهم بيركزوا على مجتمعهم بس وما بيفكروا كيف يوسعوا الاستهداف.

2. التغليف: واجهة المنتج
بصراحة، الناس بتشتري بعينها قبل يدها. شكل المنتج بيلعب دور كبير في إنه ينجح أو لا. أغلب منتجاتنا بتجي بتغليف بسيط جدًا، وفي بعض الأحيان ما بيعبر عن جودة المنتج ذاته.

3. الاعتماد على الهوية السودانية في منتجات عالمية ومسميات غير معروفة
في كتير من الأحيان بنحاول نعكس هويتنا السودانية في منتجات معروفة عالميًا، لكن بطريقة ما بتساعدنا على الانتشار. مثال واضح على ده هو محاولة تقديم منتجات زي زبدة الفول السوداني أو الشاي بأسلوب تقليدي دون تحديث أو تحسين يواكب الأسواق العالمية. كمان، بنتمسك بمسميات سودانية محلية زي الدكوة، وهي قد تكون جميلة ومعبرة بالنسبة لينا كسودانين، لكنها غامضة وغير مفهومة بالنسبة للجمهور الآخر، مما يصعّب عليهم فهم المنتج أو الوثوق فيه.

مع إنه دخول المنتجات السودانية للأسواق العالمية لسه ضعيف، لكن بدأ يظهر بشكل واضح. مثلاً، في السعودية والخليج المنتجات السودانية بقت مطلوبة، وده بفضل جهود فردية من ناس اشتغلوا بضمير وحب للمنتج.

الحلول في البوست الجاي خليكم متابعين

ليه المنتجات السودانية مستهدفة السودانيين فقط وماواصلة كل الاسواق؟؟
اسمع منكم اول

منقول للفائدة العامة اي استفسار اتواصلوا مع السفارة مباشرة

عُمان ليست فقط وطنًا لأبنائها، بل ملاذًا لكل من يعيش على أرضها. شكرًا للسلطان قابوس الذي جعلها رمزًا للسلام والأمان ووفق الله جلالة السلطان هيثم لمواصلة المسيرة الطيبة
عيد وطني سعيد 🇴🇲💚